Uwezeshaji wa Wananchi Kiuchumi Wilayani Siha awamu ya Sita ya Rais SAMIA

Posted on: May 11th, 2022

Uwezeshaji Wananchi kiuchumi Wilayani Siha mwaka mmoja wa Rais Samia Suluhu Hassan

Serikali ya Jamhuri ya Muungano wa Tanzania katika kipindi cha mwaka mmoja (Machi 2021 hadi Machi 2022) ya Serikali ya awamu ya Sita ya Utawala wa Rais SAMIA SULUHU HASSAN imetoa jumla ya shilingi milioni 837.10 kwa ajili ya kuwawezesha kiuchumi Wananchi wa   Wilaya ya Siha.

 Mkurugenzi Mtendaji wa Halmashauri ya Wilaya ya Siha ndugu Pendo Mangali  hivi karibuni ametoa taarifa ya  fedha zilizotolewa na Serikali kuu pamoja na  Halmashauri ya Wilaya ya Siha kupitia mapato ya ndani  katika uwezeshaji wa Wananchi Kiuchumi.

Katika taarifa hiyo ndugu Pendo Mangali ameeleza kuwa kati ya fedha zilizotolewa kiasi cha shilingi milioni 601.46 zimetolewa na Serikali kuu kupitia mpango wa kunusuru kaya maskini (TASAF) Wilaya ya Siha ambapo jumla ya wanufaika 3,570 walipatiwa kiasi hicho cha fedha.

Wanufaika wa mpango wa kunusuru kaya maskini Wilayani Siha wameongezeka kutoka 1,664 mwaka 2021 hadi kufikia 3,570 mwaka 2022, Pia idadi ya Vijiji vinavyonufaika imeongezeka kutoka vijiji  24 mwaka 2021 hadi Vijiji 60 mwaka 2022 amesema Mangali.

Aidha, ameeleza kuwa kiasi cha shilingi milioni 94.78 ni asilimia 10 ya mapato ya ndani ya Halmashauri na kiasi cha shilingi milioni 140.85 ni fedha za marejesho ya mikopo  zilizotolewa na Halmashauri ya Siha miaka ya nyuma.

Halmashauri ya Wilaya ya Siha Mkoa wa Kilimanjaro itaendelea kutenga fedha za mapato ya ndani ya Halmashauri asilimia 10  kila robo ya mwaka  katika kuwawezesha wananchi kiuchumi hususani vikundi vya wanawake,vijana na watu wenye ulemavu amesema Mangali